أمير مرتضي منصور يكتب لوشوشة.. المجاري الفضائيه
الثلاثاء 09/ديسمبر/2014 - 04:38 ص
أمير مرتضي منصور
بعد متابعتي للقنوات الفضائية في اخر اربع سنين جالي احساس ان الشركة اللي اشرفت على اطلاق القمر الصناعي المصري نايل سات في الفضاء ضحكت عالحكومة و بدل ما يطلقوا القمر الصناعي في الفضاء بجوار الكثير من الاقمار الصناعية قالوا نوفر و راحوا رموه في ترعة في الزقازيق او دفنوه في بلاعة مجاري في اطفيح ، و نتيجة للطفح الفضائي اللي حاصل في مصر تلاقي مذيعة مستضيفة واحدة ملحدة و قاعدين يشتموا بعض تقلب القناه تلاقي مذيع جايب منتج يسمعنا صوت “شخيره ” و هو صاحي و الكارثة ان رد فعل المذيع انه مات على نفسه من الضحك!! تقلب القناة تاني تلاقي مذيع قاعد يذيع تسجيلات لمكالمات ناس تانية متفهمش جايبها منين؟! اقلب القناة و اقول انا هتفرج على رياضة و ابعد عن العك ده الاقي استوديو تحليلي مدته ٩ ساعات لمباراة مدتها ٩٠ دقيقة !! اقلب القناة الاقي برنامج مسابقات للمواهب الغنائية جايبن نجمة لبنانية كبيرة تغني للمواهب و هي اصلاً مبتعرفش تغني بالاضافة للصدمة الكبيرة انها طلعت على الشاشة لابسه قصاقيص او بقايا فستان و هنا وقفت القناة وقفة حاسمة و قالت انها بتعتذر للمشاهدين عن ” المش ” فستان طب السؤال للقناة انتو لما جبتوها البرنامج حد كان مفهمكم انها خريجة الازهر!! حسيت اني تافه و سطحي ان بتفرج على كل اللي فات و اقول لنفسي انا هتفرج على حاجة افيد بيها صحتي و بلاها سياسة و رياضة و منوعات الاقى دكتورة قاعدة تتكلم عن العادة السرية للبنات و مدى تأثيرها على ركب البنات !! قررت اني أقاطع التلفزيون و أكتشفت أن منظومة الاعلام مش محتاجة وزير .. الاعلام محتاج ” سباك “