في ذكرى وفاته.. قصة استيلاء أبناء أحمد مظهر على أمواله!

 تحل، اليوم الأربعاء، ذكرى وفاة الفنان القدير الراحل أحمد مظهر، دون جوان السينما المصرية الذي كان ومازال فتى أحلام الكثير من الفتيات، ظلت حياة أحمد مظهر حياة سعيدة إلى أن فجرت الفنانة الراحلة مريم فخر الدين مفاجأة عن حياته وهو في سن الشيخوخة، لكن البعض شكك فيما قالته مريم فخر الدين وأكد أن هذه الأقاويل مجرد شائعة منها.. ونرصد ما قالته بالتفصيل مريم فخر الدين.

مريم فخر الدين عن أحمد مظهر: أولاده حجروا عليه

قالت الفنانة مريم فخر الدين، إن أولاد أحمد مظهر قاموا برفع قضية حجر عليه، متابعة: "كان عنده ٣٠ فدان والفدان بمليون جنيه فكانوا عايزينهم، فأنا كمان كان عندي ١٠ فدادين كتبتهم لولادي عشان ميعملوش معايا كده، غضبوا عليه وحبسوه ومكنوش بيخلوني أشوفه أنا روحت مرة لقيت طليقته، فقالتلي بيقولوا أنك متجوزاه، قولتلها هو أنا لو متجوزاه هسيبك تحطيه في البدورن؟.  دا كنت هاخده بيتي وأقعده في البلكونة وأخليه يتفرج على الأسد في جنينة الحيوانات مش هسيبه".

وأضافت: "هي كانت دايما حاسة إني هتجوزه عشان أخد منه ٣ فداين، وكانت هي وولادها بيعاملوني وحش عشان مروحش أشوفه، وكل ما أروح يقولي أنا عايز سندوتش شاورما، يعني هما هيخسروا حاجة لو جابوله؟.. وسمير صبري كان عايز يعمل معاه حوار فقولتله إديه فلوس، وفعلا عطاه وفرح بيها جداً لأنه مكانش بيشتغل وخدهم حطهم في عِبه، قامت طليقته مدت أيديها وخدتهم منه قدام الكاميرا، قولتله خلاص هاتله جبن وحاجات لرمضان خدوهم منه ومكانش معاه تليفون أطمن عليه وأخباره انقطعت خالص وكل ما أروح يخبوه مني".