في ذكرى وفاة سوزان هيوارد.. حقيقة ضربها بـ"الشبشب" من تحية كاريوكا‎

ولها قصة طريفة مع الفنانة تحية كاريوكا انتشرت في زمانهم، وهى شجار كبير نشب بينهما أدى إلى ضرب تحية كاريوكا لها بالـ"شبشب".

وكشفت الناقدة ماجدة خير الله، حقيقة ضرب الفنانة الراحلة تحية كاريوكا، للفنانة الأمريكية سوزان هيوارد، على هامش مهرجان كان عام 1956.

وكتبت "خير الله" عبر حسابها على موقع التواصل الاجتماعي "فيس بوك"، قائلة: "عام 1991 قدمت فيلم بعنوان "الجوهرة" بطولة تحية كاريوكا، وعبد المنعم مدبولي، وحسن حسني، وندى بسيوني، وخلال الاستعداد للتصوير كانت الفرصة متاحة للدردشة مع الفنانة تحية كاريوكا، وسألتها عن القصة التي تناقلها الناس وكأنها حقيقة لا تقبل الشك".

وأضافت: "وسألتها هل فعلًا قمتي بضرب النجمة الأمريكية سوزان هيوارد عشان قالت كلام سخرية على مصر في دورة مهرجان كان عام 1956، طبعًا ضحكت "كاريوكا" وقالت: تفتكري أنا ست شرشوحة ممكن أعمل كده، هل أنا مجنونة، بقى نبقى رايحين في وفد رسمي نمثل بلد ومعانا ناس محترمة المخرج صلاح أبو سيف وناس من الحكومة، وأنا اشتم أو اضرب نجمة أمريكية يعني زميلة لها فيلم زي ما إحنا لنا فيلم".

وتابعت: "طيب لو ده حصل كانت فين الصحافة العالمية اللي بتغطي المهرجان، ده لو كان حصل كانوا فضحونا وجرسونا وقالوا آدي مصر، فعدت لأسألها لكن ليه الحكاية دي أصبحت شائعة وليه مش بتكدبيها، أجابت "كاريوكا": مش بكدبها لأن محدش سألني، الناس بتحب تصدق أي حاجه فيها فضيحة، إحنا رحنا عرضنا فيلم "شباب امرأة" ورجعنا بدون جوائز وده عادي، لأن كان هناك أفلام طلاينة وأمريكان وأفلام من كل الدنيا حتى التغطية الصحفية كانت أقل من أفلام غيرنا".

واستكملت: "وأنا قولت أعمل حركة يمكن تلفت النظر، كل النجمات الخواجات لابسين فساتين سهرة وألماظات، وأنا واخدة فساتين تجنن، لكن قلت كده إحنا بنبيع الميه في حارة السقايين، فجاتلي فكرة رحت لبست ملاية لف، ومنديل بآوية، واتصورت جنب أفيش الفيلم، طبعًا مقولكيش على اللي حصل، صوري مع الأفيش بقت حديث الساعة، وأعود لأسألها يعني أنتِ ماشتمتيش سوزان هيوارد وضربتيها بالشبشب، تضحك ببعض المرارة، قائلة: ده أنا معملتهاش مع الست اللي خربت بيتي، وخدت جوزي، وطلعتني من شقتي".