أبطال "بلا دليل" يتحدثون عن خالد سليم فى عيد ميلاده
الأربعاء 06/نوفمبر/2019 - 06:17 م
علياء أحمد
مطرب ذو صوت عذب، يشدك منذ الوهلة الأولى، وممثل متمكن من أدواته الفنية، إنه النجم خالد سليم، الذى يحتفل اليوم بعيد ميلاده الـ44.
تألق "سليم" فى العديد من الأعمال السينمائية والتليفزيونية، كان آخرها مسلسل "بلا دليل" الذى يعرض حالياً على شبكة قنوات "cbc".
وبمناسبة عيد ميلاده، اختص أبطال مسلسل "بلا دليل" موقع "وشوشة" برسائل تهنئة له و كشفوا فيها عن الجانب الذى لا يعلمه الجمهور عنه.
قال الفنان حازم سمير: "من أجمل الحاجات إللي حصلت فى مسلسل بلا دليل هو أنني اشتغلت أنا وخالد، انا بحب خالد جداً، وإحنا أصحاب من سنين لكن دى أول مرة نشتغل فيها مع بعض مسلسل، و يبقى بينا مشاهد كتير".
وأضاف "سمير": "الشغل مع خالد ممتع جداً، هو كوميديان فظيع و صاحب صاحبه و جدع جداً، و أنا مبسوط بالتجربة دي و المسلسل ده معاه ، وسعيد بالشغل معاه، وكل سنة و انت طيب يا خلود، وسعيد جداً بالشغل معاك يا صحبي ".
ووجه له الفنان عمر الشناوى رسالة قائلاً: "كل سنة و انت طيب يا خالد و عقبال ١٠٠ سنة إن شاء الله، و أنا سعيد السنة دى إن اتعرفت عليك و اشتغلت معاك، وانت من أطيب و أجدع الناس اللى قابلتها و إنسان جميل، و فخور إن أنا اشتغلت معاك".
أما الفنانه ديانا هشام، فقالت: " كل سنة و انت طيب يا أحلى و أجمل فنان فى الدنيا، شرف كبير لي إني وقفت قدامك، بجد بحبك أوي و العمر كله يارب، و كان حلم إني أشوفك فى الحقيقة، فمش متخيلة إن أنا مثلت قدامك".
وقال الفنان محمد لطفي شاهين: "يا خالد كل سنة و انت طيب و عقبال مليون سنة، و أنا سعيد إن أخيراً اجتمعنا فى عمل واحد، الشغل معاك و الكواليس معاك رائعة".
وتابع: " اللي محدش يعرفه قد إيه أنت كوميدي، و وجودك بيخلق طاقة إيجابية فى اللوكيشن، قد إيه أنا مبسوط بالشغل معاك يا صديق العمر، كل عام و انت بخير".
وقالت مها نصار: "خالد سليم شخصية جميلة، وأنا استمتعت جداً بالشغل معاه، و هو من الشخصيات اللطيفة و المحترمة ومريح في التعامل مع كل الناس، و دمه خفيف جداً و بيدي كل اللي حواليه طاقة إيجابية".
