أمينة توجه هذه الرسالة لمنتقدي غنائها باللهجة العراقية

و كتبت أمينة: "تجربة أنا عن نفسي سعيدة بيها جدا، أغنية من قلب الشارع العراقي اللي أنا بعتز بيه، وغنيت بلهجته وعلى فكرة اللي كان بيشرف على اللهجة أخويا الفنان محمد السالم، وأنا اتبسطت جدا بغناها والموسيقى الجديدة اللي امتزجت بصوتي لأول مرة".  

تابعت: " يمكن الناس تستغرب، وده حاصل أوى بس حلو إن الواحد يطور من نفسه ويشتغل عليها، ناس دخلت عندي مخصوص تقولي الحكاية والرواية وإنتي شعبية وما ينفعش، أوكيه أنا معاكم إني والحمدلله سبب رئيسي في رجوع الأغنية الشعبية وبقوة، بس مافيهاش حاجة لما استغل موهبتي في غناء بعض اللهجات الأخرى فمافيش داعي للأخوة الفهيمة يشغلو دماغهم عليا عشان أنا ممكن أرد بس بكده هعمل سعر وشكرا للناس المحترمة الغير مأجورة". 

أردفت: "ملحوظة.. غنيت أغنية اسمها بلدنا مع الفنان هشام الحاج، مصرى لبنانى ٢٠١٠، وبعدين أغنية مزة مصرية، مع النجم محمد السالم ٢٠١٤، بعديها إحنا الشباب، مع النجم محمد السالم ٢٠١٦ ، وأغنية أخلع مع الفنان أمير يزبك لبنان ٢٠١٩، وطبعا لسه هغني وطول ما ربنا وهبني صوتي هغني بكل اللهجات، مش مشكلتي أنك مش متابعني، بس يمكن مش متابعني عشان صفحتي مش متوثقة مثلا؟".