رسالة إلي مؤلفي المسلسلات : باقي ٣٧٥ علي رمضان القادم

أحيط سيادتكم علما بأن شهر رمضان الكريم يأتي كل عام في وقت معروف ومحدد - رجب وبعديه شعبان وبعديه رمضان - و أن الوحي من السهل أن يهبط علي سيادتكم في أي من أيام العام ، كما أنك تستطيع أن تتعاقد علي السيناريو بعد كتابته وليس شرطا أن تتعاقد علي فكرة ثم تبدأ الكتابة قبل التصوير بأسابيع ويبدأ المسلسل التصوير ومعه ١٠ حلقات علي أقصي تقدير .

حضرتك بتقول و إنت مالك ! ، هقول لحضرتك مالي ، مالي إنك لما بتتزنق في الوقت بتبدأ " تعك " في الكتابة و " تمط " في الأحداث ، والمخرج بيحاول يعمل " تايم " في التصوير عشان المنتج بيقف وراه ب " ستوب واتش " وكل ده بيؤدي إن الممثل مش بيلحق يذاكر ، والنتيجة إن يبقي في مسلسل بدأ أول كام حلقة حلو جدا والناس مشدودة معاه ، وفجأة نجد أنفسنا في حالة من الهذي الغير مبرر وده ما يرضيش ربنا .

لذلك نهيب بسيادتكم الإستعداد من الأن لشهر رمضان القادم الذي يتبقي عليه حوالي ٣٧٥ يوم .. اللهم بلغت اللهم فأشهد .

الراسل                   

هناك قلة ليس لهم علاقة بالسطور الماضية فهم يحترمون المشاهد ويحترمون أسمائهم فأجبروا الكل علي إحترامهم .