فيس بوك يروى معاناة النجوم.. مكى قاوم الموت وحيداً.. وتامر حسنى يكشف رحلة البهدلة

بعد فترة غياب كبيرة عن الساحة الفنية، استمرت 5 أعوام سينمائيًا، وعامين على الشاشة الصغيرة، قرر النجم أحمد مكي الكشف عن سبب هذا الغياب لأول مرة.

 وقال "مكي" ، عبر صفحته الرسمية على "فيس بوك": "بقالي سنة تقريبًا عيان جدًا، كان عندي فيروس ضربلي الكبد والطحال، مكنتش حتى أقدر أشرب بق مية بسبب الطحال، وكنت في شبه كومة أول شهرين من المرض، عشان الكبد كان عملي خمول، كنت بأنام من 18 لـ20 ساعة في اليوم".

وأضاف: "خسيت فوق الـ30 كيلو وكنت شبه فاقد للأمل، الحمد لله على كل حال، أنا دلوقتي خفيت تمامًا ووزني زاد تاني، واتعلمت كتير جدًا في الرحلة دي، وكان فارق معايا جدًا سؤالكم عني، حسيت إن ليا أهل مش جمهور، وإني فرقت معاهم لما غبت، ربنا يفرح قلوبكم زي ما فرحتوا قلبي، وأهلًا بيكم في صفحتي". 

أما عن إنشائه صفحة على "فيس بوك" برغم إعلانه أكثر من مرة أنه لا يحب هذا الأمر، قال "مكي": "اللي خلاني أعمل الصفحة دي إني لقيت كم ناس سألت عليا لما غبت السنة اللي فاتت وبيستفسروا أنا اختفيت فين، وكنت حابب أشكرهم على سؤالهم عليا لأنه فعلًا فرق معايا نفسيا وكنت محتاجه أوي".

وللرد على السخرية، التى تعرض لها علق الفنان تامر حسني على صورة انتشرت له مؤخرًا وهو في فترة الشاب، والتي أثارت الكثير من الجدل.

وقال حسني، عبر صفحته على فيس بوك: "لمن يهمه الأمر.. من يومين نزلت صورة ليا وأنا صغير، وشغلت ناس كتير، وفضلوا يتريقوا على الصورة، في الحقيقه إني في الوقت ده فعلا كنت بحاول أقلد المشاهير في صورهم وأفلامهم وحركاتهم".

وأضاف: "وبغض النظر عن أن في الوقت ده كانت الموضات شبه كده، وأنا بقول شبه كده لأني كنت ولد صغير معندوش فلوس نهائي يشتري لنفسه حاجة غالية، ولا عنده أب يشتري له حاجة أصلاً". 

وتابع: "اللي عايز أقوله إني من يوم الصورة دي وأنا حالف إني أتصورها بجد وأنا مشهور، الصورة دي بتثبت لأي شاب إيجابي إن مفيش مستحيل، واللي عايز يتريق على الولد اللي في الصورة هقوله يا رب تنجح زيه".

واستطرد: "أنا فخور بالصورة دي، والنهارده بقول للولد الصغير ده إنت راجل عشان حلمت بحلم وحققته، وبدأت من تحت الصفر ووصلت لحلمك بمجهودك وعرقك وكمان اشتغلت شغلانات كتير فيها شقى وتعب عشان تصرف على أهلك من وإنت في السن ديه، واختتم: "شكرًا يا ولد يا صغير إصرارك عمل مني راجل إنسان فنان اسمه تامر حسني".

ونشرت الفنانة نشوى مصطفى، صورة عبر صفحتها على موقع التواصل الاجتماعي «فيس بوك»، لبعض الشباب، الذين يقومون ببيع البطاطا، في أحد شوارع القاهرة، لكنها لاقت هجومًا حادًا من مستخدمي تلك المواقع. 

وردت نشوى عليهم، قائلة: «طيب بمناسبة إنى شيرت صورة لشباب زى الورد بيبيعوا بطاطا، وقلت عفارم عليهم إنهم ماستسلموش للإحباط وللبطالة ولا قعدوا يولولو ويشتموا في البلد، ونتيجة للردود اللي بعضها سخيف وبيقولولى إنتى فنانة بتاخدى فلوس قد كده ومش حاسة بالشباب المحبط، وعايزانا بعد مانتخرج من كلياتنا المحترمة نبيع بطاطا، ونتيجة الرسايل الشتيمة الإنبوكس، عايزة أقول لهم أبويا الله يرحمه كان من الطبقة الكادحة الطبقة تحت المتوسطة بشوية كتير». 

واستكملت: «أبويا ربانى إنى أكون راجل، بمعنى إنى لما اتخرجت ومالقتش شغل عملت وجبات جاهزة في البيت وبعتها في العتبة للبياعين اللي بيشتغلوا في محال الملابس، ليه العتبة بالذات، لأنى في إجازات الصيف بتاعت الجامعة كنت باشتغل بياعة في المحال دى علشان يكون معايا فلوس زيادة عن المصروف اللي باخده من أهلي، وليه عملت وجبات جاهزة وبعتها؟، لأنى كنت عايزة أدرس تمثيل، ودخلت المعهد وابتديت تمثيل بعشر مشاهد في ضمير أبلة حكمت، وكان أجرى في المسلسل كله ٢٥٠ جنيه». 

وتابعت: «كنت ساكنة في شبرا بيتنا أوضتين، دلوقتى بفضل ربنا وبمجهودى أنا ساكنة في فيلا دورين بحمام سباحة في أرقى مكان في التجمع الخامس، اتعلمت في مدارس حكومة وكنت باخد الكتب ببلاش في الجامعة لأنى كنت مقدمة مفردات مرتب والدى إنها بسيطة، دلوقتتى بفضل ربنا وبمجهودى ولادى جامعة أمريكية وألمانية، وماحدش ساعدنى غير ربنا». 

وأضافت: «مافيش منتج دعمنى وادانى بطولة وأنا استاهلها بجدارة، أثبت إنى بمشهدين تلاتة ممكن أسيب تأثير وأحقق نجومية باشوفها في كلام معجبينى في كل مكان جوة مصر وبراها، أنا باشتغل بمجهودي، اتحاربت وصمدت اتساومت وما استسلمتش لأنى مؤمنة بحلمى ومؤمنة بإن ربنا مع اللي بيتعب». 

ووجهت رسالة لهؤلاء الشباب قائلة: «حارب علشان حلمك وماتشتمش بلدك ولا ظروفك ولا تشتم الممثلين».