" وشوشة " تنفرد بأول حوار مع " بطريق " مول مصر قبل وصوله
وشوشة إستطاعت الإنفراد بحوار مع البطريق " كابيكا " قبل وصوله مصر ، وفيما يلي عرض لهذا الحوار :
هواري : مساء الخير يا فندم أنا صحفي مصري من موقع وشوشة .
البطريق : مساء النور ، عايز إيه مني ؟
هواري : لأ مش عايز حاجة بس حبيت آخد من حضرتك كلمتين عن زيارتك لمصر ؟
البطريق : بخصوص زيارتي لمصر أنا مستاء جدا ، أنا مش سامع عن أي مراسم إستقبال ولا أي برامج لزيارة أي معالم أثرية ولا حتي عاملين مؤتمر صحفي ليا
هواري : مراسم إيه و مؤتمر إيه و أماكن أثرية إيه اللي هتزورها !!
البطريق : أيوه يا أستاذ هو ميسي أحسن مني ! ده أنا لسة ما طلبتش عمرو أديب كمان يصور معايا
هواري : وانت تعرف عمرو أديب منين ؟؟
البطريق : يا حبيبي أنا مؤسسة ، عندي مستشارين إعلاميين و سكرتارية و حراسة و سواقين ، وعارف كل حاجة عنكم حتي " الهري " اللي علي الفيس بوك عليا عندكم كله بيتبعتلي .
هواري : يعني أنت عارف ...
البطريق مقاطعا بغضب : إسمها حضرتك ، خليك محترم إنت مرتبك كام يا حبيبي ؟
هواري : أنا آسف ، وليه بتسأل عن مرتبي ، إنت مجرد سمكة زي أي سمكة كبيرة شوية ، أو أي حيوان من اللي العيال بتطلع عين اللي خلفوه في جنينة الحيوانات ، ، و إيه مرتبي دي ، هو أنا سألتك عن مرتبك ؟
البطريق ضاحكا : مرتب مين !! يا حبيبي أنا بشتغل بالدقيقة ، إنت عارف أنا عشان نفسي أزور مصر خفضت أجري ، ووافقت آخد ٨٥٠ جنيه في ١٠ دقائق بس .
هواري : ده الكلام طلع بجد ! يعني لو هتشتغل ٨ ساعات في اليوم يعني ٤٠ ألف و ٨٠٠ في اليوم يعني في الشهر مليون و ٢٢٤ ألف جنية !! يانهار أسود
البطريق : بتقول إيه ؟؟
هواري : لأ يا أستاذ بطريق مش بقول حاجة ، أنا بس كنت بعيد صياغة الأسئلة يا فندم ؟
البطريق بيه : إتفضل .
هواري : إيه الفندق اللي هتنزل فيه معاليك لما توصل مصر بالسلامة ؟
البطريق بيه : الشركة عايزة تحجزلي في " موفينبيك " عشان قدام المول بس أنا حابب " فورسيزونز " خصوصا و إن " الشلة " بتاعتي بيقعدوا هناك
هواري : ومين " شلة " حضرتك اللي بيقعدوا هناك ؟
البطريق بيه : لا تعليق ، " كل عيش ".
هواري : و إيه البرنامج المصري اللي بتابعه سيادتك ؟
البطريق بيه : بتابع برامج كتير بس أنا بحب " صبايا الخير " جدا عشان أنا عشاق ريهام سعيد وعايز أقابلها لما أوصل .
هواري : معاليك بتحب الأكل المصري ؟
البطريق بيه : أنا بحب المأكولات البحرية بشكل عام وصحابي نصحوني بمكانين " قدورة " و " سمكمك ".
هواري : حضرتك متابع للفن المصري ؟
البطريق بيه : أنا بسمع رضا البحرواي و أحمد شيبة و رمضان البرنس .
هواري : و في التمثيل ؟
البطريق بيه : أنا من عشاق النجم عبد الله مشرف و وكمال أبو رية وبدرية طلبة .
هواري متعجبا : هي دي أول مرة حضرتك تيجي مصر !!
البطريق بيه : فعلا دي أول مرة ليا آجي مصر ولكن عشان أنت ولد مجتهد هديلك إنفراد ، أنا أصلا جدي كان مصري ومولود في " ترعة المريوطية " وهو اللي علمني حب مصر .
هواري : تصدق أنا كنت خايف عليك في مصر بس دلوقتي أنا خايف علي مصر منك .
البطريق : بتقول حاجة ؟؟
هواري : لأ يا فندم بقول إنك لازم تيجي تشرفنا في وشوشة ونعمل " ندوة " لحضرتك .
البطريق : أه ونتصور " سيلفي " ونكتب ولسة اللي جاي أحلي :)
هواري : .......
موضوع " تخيلي " لا أساس له من الصحة