4 تغريدات سياسية لـ"نشوى مصطفى" تثير الجدل

تعبر الفنانة نشوى مصطفى، دائمًا عن آرائها السياسية عبر مواقع التواصل الإجتماعي، وتدخل في جدل مع متابعيها بسبب بعض الآراء التي تقولها دائمًا بكل صراحة ووضوح، دون أن تنشغل بردود الفعل عليها.

وفى السطور التالية نستعرض أبرز التغريدات لنشوى والتى آثارت جدلًا واسعًا مابين مؤيد ومعارض...

أزمة الدولار

علقت نشوى مصطفى، على أزمة ارتفاع سعر صرف الدولار في مقابل الجنية المصري بالسوق السوداء، حيث كتبت: أنها تصدق في سياسات الرئيس المصري الذي أنتخبته، وإن البلاد تواجه حربًا شديدة، وأنها على استعداد للصوم طوال السنة.

أضافت: بمناسبة الناس اللي بيندبوا علشان سعر صرف الدولار وعلشن اقتصادنا الى فى النازل وعلشان الناس اللي مش لاقية تاكل، طيب خدوا منى الكلمتين دول، زمان كنا بنقف طابور فى الجمعية علشان ناخد فرخة على بطاقة التموين، لكل أسرة فرخة واحدة، وكنا بنشوف واسطة أو ندفع رشوة علشان نجيب اتنين كيلو لحمة جمعية.

أوضحت: زمان كان أبويا بيعمل جمعية فى الشغل مع صحابه علشان يقبضها أول السنة الدراسية علشان مايقدرش يدفع مصاريفنا من مرتبه، زمان كنت باقدم شهادة فقر علشان اخد كتب الجامعة ببلاش لأن مرتب أبويا مابيكفيش، زمان ماكنتش اقدر اشترى هدوم من وسط البلد فكانت أمى بتفصل لنا علشان مافيش فلوس.

وأضافت: كان اقتصادنا طين -- ليه؟؟ كنا طالعين من حالة حرب، دلوقتى بقى، احنا بنحارب، بنحارب بجد، اللي ليه قريب مجند فى سينا يسأله لو مش عارف، واللي ليه قريب فى السياحة يسأله ليه مافيش سياحة لو مش عارف، واللي ليه قريب كان بيشتغل فى مصنع من مصانع العاشر أو ستة اكتوبر يسأله ليه قفلوا المصنع لو مش عارف، واللى عنده نظر يشوف اللي بيحصل حوالينا فى بلاد عربية شقيقه ويركز فى مصيرهم.

وقالت نشوى عبر صحفتها: وأخيراً.. أنا عارفة اننا فى كارثه وبعانى منها زي كل أهل مصر، بس بمنتهى الرجولة حاستحمل، وحاقدر لو الظروف حكمت اصوم طول السنه علشان أكل طقة واحدة لو الظروف حكمت، وحاقدر استحمل أن بنتى تتأخر ترم أو حتى سنه دراسية لو ماعنديش مصاريفها، أنا ست مصرية، مصرية بجد، أنا فى حمى جيش مصر، أنا مصدقة فى الرئيس اللي انتخبته بكل ارادتى وباشوف هو بيعمل ايه وولاد الـ... بيحاربوه علشان مصر تبقى زى اللي حواليها، اللي شايف انى تقيلة على قلبه وانى قناعاتى ضد قناعاته وان حبى لبلدى حيضايقه يطلع بره وياخد الباب فى ايده -- وتحيا مصر رغمًا عنهم ان شاء الله.

الهجوم على الإخوان

تراجعت الفنانة نشوى مصطفى، عن مهاجمة وزير التربية والتعليم لعدم تهنئة الفتاة الأولى على الجمهورية في مرحلة الثانوية العامة، لكون والدها منتمي لجماعة الإخوان المسلمين، بل واعتذرت له.

وجاء تعليق نشوى مصطفى عبر حسابها على موقع التواصل الاجتماعي Facebook، بعد أن نشرت من خلاله اعتذار لوزير التربية والتعليم وهجوم حاد على الفتاة.

وكتبت نشوى: "أعتذر عن المنشور الذي دافعت فيه عن الإخوانية ابنة الصهيوني الإخواني التي طلعت الأولى على الجمهورية، وقلت أن الوزير غلطان أنه لم يكرمها مثل الباقيين".

تابعت: "بنت القتلة تسب رئيس الدولة الذي كان بمنتهى البساطة لو فيه اضطهاد ما كان جعلها تنجح اساسًا، الله ينتقم من كل إخواني كاره لوطنه، ما الإخوان كان سبب في قتل شهيد من عيالنا في الشرطة والجيش والشعب كمان".

"يا ابنة القتلة قاتلك الله وحسبنا الله ونعم الوكيل فيكي حسبنا الله ونعم الوكيل في كل حقير أو حقيرة تكره مصر وتكره البطل اللي نجانا منكم، افضحوا مشروع إرهابية جديدة وشيروا يا مصريين، أنا حذفت المنشور السابق وأعتذر".

وجاء تراجع نشوى مصطفى، عن مساندة الطالبة الأولى على الثانوية العامة بعد الحوار الذي أجرته مع المذيع محمد ناصر، لتؤكد فيه رفضها لمقابلة الرئيس المصري عبد الفتاح السيسي، في حالة رغبته في تكريمها، ونشرت مصطفى الفيديو الذي صرحت فيه بهذه التصريحات.

تحيا مصر رغم أنف العيال العبيطة الموهومين

قالت الفنانة نشوى مصطفى، عبر صفحتها الخاصة بموقع التواصل الاجتماعي فيس بوك: تحيا مصر رغم أنف المختثين المتطاولين على الهامات العالية، زمان كان فى ضهر كل رئيس وزارة إعلام بتخدم عليه وبتدعمه وتصيته وتحشد لقرارته وتهلل له وتطبل له وتعمل له اوبريتات واغانى -- دلوقتى مافيش إعلام حكومى مات اكلينيكيا -- لكن فيه إعلام رجال الأعمال -- كل رجل أعمال يملك قناة بيشغلها لصالح أهدافة -- ولإن سيادة الرئيس قالها بشكل واضح اكتر من مرة -- مابديش حاجة لحد وماحدش ليه عندى مصالح من رجال الأعمال ومصر لازم تاخد حقها من أي مستفيد من الانظمة السابقة -- فبعض برامج التوك شوز بدل ماتكون فى ضهر قيادة البلد فى الظروف دى بتطعنه فى ضهره -- بس مش فاهمين إن ضهره محمى بشعب مصر اللي اختاره -- وشوية العيال العبيطة الموهومين فاكرين اننا حنقبل تانى انهم يضيعوا مصر -- تحيا مصر غصب عن أهداف اسيادكم.

وتلقت "نشوى"، بعض ردود الفعل الغاضبة على ما كتبته ولكنها دافعت عن رأيها عبر التعليقات وقالت إنها مصرة على رأيها.

البيادة أطهر من مدمني الكافيه

دافعت الفنانة نشوى مصطفى، عن السيدة التي انتشرت صورتها عبر مواقع التواصل الإجتماعي من الاحتفال بعيد تحرير سيناء الماضي، وظهرت فيها تلك السيدة وهي تضع بيادة الجيش فوق رأسها.

وكتبت "نشوى"، عبر صفحتها الشخصية في موقع Facebook مدافعة عن صاحبة الصورة وموضحة أنها والدة أحد شهداء هجمات سيناء الإرهابية التي وقعت في فترات سابقة، فكتبت "الست العظيمة دى أم الشهيد أحمد عبد الرازق، اللي استشهد فى سينا وهو بيدافع عن دكاترة ورؤساء اقسام الوطنية اللي اتريقوا على امه علشان شايله بيادته القديمه فوق راسها".

ووجهت "نشوى"، كلامها إلى من يتحدثون ويسخرون من هذه السيدة واصفة أياهم مدمني كافية لاتيه في قهاوي وسط البلد: "اغالى يابطل بيادتك اطهر من دماغ مدمنى الكافيه لاتيه على قهاوى وسط البلد".