"نجل" رئيس الزمالك يوجه رسالة لـ"أحمد سليمان"

"للأسف رغم إنه مش وقته الكلام اللي هاقوله ده بس لازم التوضيح علشان.. من حق الجمهور يعرف إيه اللي بيحصل دلوقتي، والكلام ده بقوله بصفتي مشجع زملكاوي قريب من الأحداث  كمان بصفتي متطوع إني اتفاوض وأتعاقد مع بعض اللاعبين والمدربين عندما يطلب مني نظرًا لقربي من بعض اللاعبين سواء في الفريق او في فرق الدوري .. لازم الناس تركز في النقط اللي هقولها لأني بخاطب الجمهور الذكي الواعي اللي بيفهما وهي طايرة ١- مش أي شخص ينزل صورة مع لاعب سواء مسئول أو وكيل أو حتى انا يبقى هو اللي جابه لأن في مجهود كبير بيتعمل في مرحلة التفاوض مش عايزين نختذله في مين اللي خد الصورة. 

٢-لا أنكر دور كابتن أحمد سليمان كباقي أعضاء المجلس في إنهاء الصفقات والإنشاءات وجلب عقود رعاية تليق بالزمالك، ولكن السؤال كيف عرف جمهور الزمالك إن الكابتن احمد سليمان هو جنرال الصفقات ؟؟؟ الإجابة عن طريق السوشيال ميديا والصور التي ينشرها الكابتن أحمد سليمان مع اللاعبين.

٣-سؤال إلى جمهور الزمالك .. ماذا لو قام أي مسئول آخر أو عضو مجلس إدارة غير الكابتن أحمد سليمان بنشر صورهم مع الصفقات ؟؟ مثال لو المدير الاداري الكابتن حمادة أنور نزل صوره مع كل صفقات الموسم الحالي عالفيسبوك هل ده معناه ان حمادة انور هو ملك الصفقات الجديد!!!.

٤- سؤال مباشر لأخويا الكبير الكابتن أحمد سليمان .. لماذا قمت بوضع شروط جزائية في عقود اللاعبين الشناوي و باسم مرسي ولماذا لا تتحمل المسئولية أمام الجماهير عن هذا الخطأ الجسيم ... ما هي حاجة من الاتنين يا حضرتك اللي جبتهم الزمالك وتكون مسئول عن بنود عقودهم كاملاً يا إما حضرتك لم تتفاوض معهم من الأساس بالتالي ليس عليك التباهي والتفاخر بالتعاقد معهم..وبالتالي في ناس تانية مطالبة بتدارك خطأك وتعديل عقود اللاعبين وإلغاء الشروط الجزائية في عقودهم .

٥-ليه يا كابتن أحمد اي لاعب من اللاعبين اللي حضرتك متصور معاهم لما بيجيب جول أو بيتألق حضرتك فورًا بتنزل صورتك معاه في إشارة للجمهور ان الفضل ليك انت لوحدك ... مع العلم إن أي لاعب الزمالك تعاقد معاه بعد حضرتك ما استقلت وتألق مع الزمالك أو أحرز هدف حضرتك بتتجاهله مع انهم من أبناء النادي وآخرهم تألق شيكابالا وإحرازه هدف في أخر مباراة!!!.

٦-أي انتقاد علني مني لحضرتك لا يقلل من احترامي ليك مع العلم اني عمري ما انتقدت حضرتك أثناء وجودك بالمجلس وانتقادي ليك دلوقتي من زملكاوي لزملكاوي رغم اني كان عندي انتقادات لحضرتك كتير أثناء وجودك بالمجلس، لكن أنا مؤمن إنه مش من حقي انتقد أداءك كعضو مجلس ادارة حتى لو عندك أخطاء زي عقود بعض اللاعبين المبالغ فيها أو الشروط الجزائية الغير مبررة للشناوي وباسم أو خلافك مع شيكابالا وغيرهم.

٧- لازم الجمهور يبقى فاهم إن الزمالك نادي كبير وإن أي لاعب يتمنى يلعب للزمالك أو الأهلي، وده واقع وحقيقة لا يمكن إنكارها.. يعني لما اتعاقد مع لاعب من أي نادي في مصر علشان يلعب في الزمالك دي مش محتاجة عقلية فذة لأن ٩٠٪ من نجاح المفاوضات بتكون مرتبطة بأسم وجماهيرية الزمالك مش باسم المسئول اللي بيتفاوض مهما كانت قيمته او شهرته او نفوذه و١٠٪ المتبقية بتكون مرتبطة بإرتياح اللاعب للشخص المكلف بالتفاوض وبأسلوبه في التفاوض والمقابل المادي وفرصة مشاركته كأساسي وبعض الوعود الشفوية اللي مش بتتكتب في العقد.

٨-لو عايزين نكافأ او نشكر شخص بسبب صفقة معينة سواء بيع او شراء لاعب او مدرب لازم نفهم امتى نقوله برافو .. نقول برافو لما الشخص اللي بيتفاوض ان يغير وجهة اللاعب مثلًا من الأهلي للزمالك أو إنه يجيب اعلى سعر في بيع لاعب او انه يجيب لاعب او مدرب مهم بفلوس قليلة او انه يكون عنده رؤية مستقبلية انه يحط بنود في عقد اللاعب يقدر النادي يستفيد منها حتى بعد رحيل اللاعب زي ما حصل مع عمرو ذكي مثلاً يجيب اهداف مع ويجان الزمالك ياخد فلوس ويشكر في ده مجلس ممدوح عباس.

٩-الزمالك الموسم قبل الماضي تعاقد مع ق١٨ لاعب استفاد في الموسم ده من ١٤ لاعب من ال ١٨ وحصد الدوري والكاس مع اختلاف نسب استفادة الفريق من كل لاعب في لاعيبة فادت الفريق طوال الموسم و في لاعيبة فادت الفريق على فترات وجعملت اللي عليها على قدر المتاح (الشناوي-على جبر-كوفي-اسلام جمال-دويدار-احمد سمير-ابراهيم صلاح-معروف يوسف-محمد شعبان-طارق حامد-ايمن حفني-احمد عيد-خالد قمر-باسم مرسي) يعني نسبة نجاح الصفقات في الموسم الاول تخطت ال ٩٠٪ .

١٠- الموسم السابق الزمالك دعم صفوفه ب ٨ لاعبين (كهربا-حمودي-محمد ابراهيم-شيكابالا-محمد عادل جمعة- محمد سالم-ابراهيم عبد الخالق-مايوكا-شريف علاء) و موسم الانتقالات ده كان كابتن احمد سليمان تقدم بإستقالته قبل ما نتعاقد مع اي لاعب بعد مشكلته مع شيكابالا.

١١-الموسم الحالي الجمهور الزملكاوي كان مستاء جداً من الإدارة بسبب عدم تدعيم الفريق للموسم الجديد و فجأة و بعد الاعلان عن نصف الصفقات فقط شعرت الجماهير بالارتياح .. هل المفترض الاعلان عن الصفقات قبل انتهائها حتى يرضى الجمهور ام نعلي مصلحة النادي و نتكتم على المفاوضات حتى لا تفشل او لا يتدخل المنافس للمزايدة وسيتم الاعلان عن باقي الصفقات حين الانتهاء منها.

12-رسالة لجمهور الزمالك اللي بيسأل ليه كهربا وعمر جابر مشيوا رغم احتياج الفريق ليه و احتياج الفريق اهم من الدولارات .. احب اقول ان الكواليس بتكون مختلفة و صادمة رغبة اللاعب و طموحه بتكون اقوى من عقده و مفيش لاعب هيلعب غصب عنه حتى لو متبقى في عقده ١٠ سنين يبقى في الحالة دي اقل الخسائر ان نستفيد منه مادياً لو مش هنستفيد منه فنيًا.

١٣- في بعض اللاعبين بدون ذكر اسماء اللي الجمهور بيطالب ان الزمالك يتعاقد معاهم علشان اللاعيبة دول زملكاوية و صرحوا في الاعلام و الفيسبوك انهم هيموتوا و يلعبوا في الزمالك لو بيلاش.. أحب اقولكم والله العظيم في الكواليس بيطلبوا ملايين بس للاسف الواحد بيحترم سرية المفاوضات وميطلعش يقول اللي بيحصل في الكواليس .. اسهل حاجة ان الواحد يحط اي رقم اللاعب يطلبه و يقول وانا مالي هو انا دافع حاجة من جيبي وبعدين الجمهور عايز اللاعب ده  ولو جيبته هبقى ملك الصفقات وحبيب الملايين.

١٤-هل من المنطقي الاعلان عن الصفقات رغم ان الفريق الحالي على اعتاب بطولتين مهمين كأس مصر و دوري الابطال!!!.

١٥- بالنسبة للصفقات والقيد الافريقي والقائمة المحلية .. وارد يتم إعارة لاعب مهم في الفريق في وفرة في مركزه سواء داخل الفريق او داخل الدوري المصري في المقابل الابقاء على لاعب تاني مستواه مش قوي لكن ميكونش ليه بدائل.

١٦- عزيزي الزملكاوي هل تعلم ان هناك بعض الشخصيات المحسوبة عالزمالك للأسف بتكلم اللاعيبة اللي الزمالك بيتفاوض معاهم و يقولولهم الزمالك مفهوش فلوس من منطلق انهم مش في الصورة او لخلافات مع رئيس النادي !!! اتمنى ان تدرك الجماهير حجم المسؤلية و الصعوبات .. الزمالك باقي و كله ماشي ‫#‏انضف_جمهور_في_العالم.