إيناس عز الدين توضح حقيقة مرضها

طمأنت المطربة إيناس عز الدين، جمهورها بعد تعرضها لوعكة صحية دخلت على أثرها المستشفى.

كتبت "عز الدين"، على صفحتها الشخصية بموقع التواصل الإجتماعى "فيس بوك": "أنا عارفة إن ناس كتير قلقانة عليا وبعتولي رسايل وكلموني علشان يطمئنوا عليا بعتذرلكم كلكم على عدم ردي وبجد بشكركم من كل قلبي على خوفكم واهتمامكم ودعواتكم الغالية اللي بتمنالكم مثلها يارب واكتر بكتير، أنا عندي قرحة مزمنة في القولون وهعيش بيها عمري كله ولو ما قدرتش اتحكم في انفعلاتي هضطر آجلًا أم عاجلًا أشيل القولون".

أضافت: "ووصلت لمرحلة نزيف القولون وده أضعف جسمي تمامًا وخلاني فقدت 10 كيلو من وزني في أقل من أسبوع وكله من سوائل الجسم وده عملي جفاف تام ودخلت في مرحلة شديدة من هشاشة العظام وتلف أعصاب بسبب عدم دخول الأكل والمية جسمي وده كان مخليني مش بقدر أحرك أطرافي ولا بقدر اقف على رجلي لأن كان القولون رافض تمامًا الأكل والشرب، وحتى المحاليل ما كانتش كفاية إني أعيش بالإضافة لتشخيص حالتي غلط أكتر من مرة وده دهور حالتي أكتر لحد ما روحت لدكتور هو اللي ساعدني على إني الاقي العلاج المناسب لحالتي وإمبارح كان أول يوم اقف على رجلي بعد ما اخدت حقن أعصاب وفيتامينات والحمد لله النهاردة بدأت في التحسن ببركة رب العالمين وببركة دعاكم أنتم يا أغلى الناس على قلبي وأول حاجة فكرت فيها حتى وأنا لسه تعبانة هي إني أطمنكم علي عسي ربي يخليكم ليا يا أغلى أهل وأخوات".