ننفرد بنشر أسباب الازمة المالية في القنوات الفضائية

لحديث الدائر هذه الأيام هو عن الأزمة الإقتصادية الكبيرة التي تعصف بصناعة التلفزيون و القنوات الفضائية..و من دلالاته التأخر في صرف الرواتب...تخفيض العمالة...إغلاق قنوات ثانوية و العجز عن سداد المديونيات المستحقة للمنتجين و موردي المحتوى التلفزيوني بجميع أشكاله.... و يتسائل الكثيرون عن السبب في هذه الأزمة و كيفية الخروج منها...لأهمية هذه الصناعة داخليا و خارجيا على أكثر من مستوى... و لوجود عدد كبير من العاملين في المجال مهتمين و قلقين على مصير مصدر رزقهم و مهنتهم... والسبب إقتصادي بحت و تفسيره محتاج شوية صبر من جهة حضراتكم ...فاسمحولي أشرحه من وجهة نظري: هناك حوالي ٢٠ قناة فضائية تتنافس على الكعكة الإعلانية للسوق المصري... و هم... الحياة الحمراء...الحياة البنفسجي... دريم ١...دريم ٢ ... المحور .... النهار .... النهار اليوم...أون تي في ...القاهرة و الناس ...سي بي سي سفرة....سي بي سي...سي بي سي إكسترا...صدى البلد...إم بي سي مصر...إم بي سي مصر ٢ ... روتانا مصرية ... الفراعين (أيوة لها نصيب من الإعلانات)... روتانا أفلام ... اليوم (اللي بيظهر فيها عمرو أديب)... و تن (التحرير سابقا)... ٢٠ قناة بموظفينهم باستوديوهاتهم و شاشة عمالة تبث ولازم تحصل تغذية دائمة للإبقاء و الإستحواذ على المشاهد ... بس تعالوا نفهم هما بيصرفوا كام كل سنة ...تقريبا طبعا... و دة من غير قنوات التلفزيون المصري ال ٢٠ و قنوات الدراما و القنوات الدينية و قنوات بير السلم اللي بتذيع أفلام مسروقة...
 ١- متوسط المصروفات الأساسية لكل قناة حوالي ٥ مليون جنيه شهريا (مرتبات...إيجارات.. شارة بث ..إلخ) يعني ال ٢٠ قناة دول بيصرفوا متوسط ١٠٠ مليون جنيه شهريا يعني ١،٢ بليون جنيه سنويا (دة كدة لسة ما قلناش بسم الله الرحمن الرحيم)!!
٢- كل قناة عندها نجم واحد على الأقل بياخد مبلغ و قدره... و فيه قنوات فيها ٣ أو ٤...بس خلينا نفترض نجم واحد لكل قناة...بمتوسط أجر ٥٠٠ الف جنيه شهريا لكل نجم يعني ١٠ مليون جنيه شهريا لل ٢٠ قناة يعني ١٢٠ مليون جنيه سنويا!!
٣- هناك حوالي ٤٠ مسلسل درامي يتم التعاقد عليهم كل عام لكل القنوات ...متوسط قيمة المسلسل حوالي ٢٥ مليون جنيه ...يعني مليار جنيه مسلسلات!!
٤- قيمة شراء حقوق الدروري المصري ما بين حقوق و ما بين استوديوهات التحليل و النجوم المعروفين و المحللين حوالي ٢٠٠ مليون جنيه!! ٧- كل قناة بتستضيف فنان أو شخصية شهيرة مرة على المتوسط كل أسبوع...و الضيف دة بياخد فلوس .. متوسط ٢٥ الف جنيه للضيف... يعني ال٢٠ قناة بيستضيفوا ضيوف بحوالي ٣٠ مليون جنيه في السنة!!
 ٥- كل قناة من دول بتشتري أربع برامج كبار من برامج الفورمات سنويا كمتوسط عام لإثراء شاشاتهم و تمكينهم من المنافسة بمتوسط ١٠ مليون جنيه للبرنامج يعني إجمالي ٨٠٠ مليون جنية!! (يوجد برنامج حاليا على الشاشات قيمته ٥٠ مليون جنيه لوحده...)
 ٦- مصاريف التسويق والدعاية للقناة و للبرامج... القنوات بتصرف على الافتات في الشوارع و إعلانات الجرائد متوسط ١٠ مليون جنيه سنويا...يعني ٢٠٠ مليون جنيه!! لو جمعنا الأرقام اللي فوق سنجد أن إجمالي الإنفاق لل ٢٠ قناة دول بس يتعدى ال ٣،٥ مليار جنيه سنويا!! حلو؟....طيب الكعكة الإعلانية فيها فلوس قد إيه؟ على أكثر التقديرات تفاؤلا يقال أنها تلامس رقم ٢،٥ مليار جنيه... يعني من الآخر.... هناك مليار جنيه خسارة لل ٢٠ قناة دول فقط.... نعم...الف مليون جنيه ضاعوا و مش جايين...و ده غير السنة اللي قبلها و اللي قبلها...نحط عليهم زيهم....يبقى العجز المالي لدى القنوات ال٢٠ التي تتنافس في السوق المصري يصل ل ٢ مليار جنيه!! وبالتالي هناك أزمة حقيقية و صعب حلها جدا.... أما ليه ماحدش حسبها قبل ما يستثمر و ليه لسة فيه ناس بتزداد غرقا في الخسارة و مكملين...وليه فيه ناس بتفتح قنوات جديدة...و ليه الناس اللي بتورد برامج و مسلسلات و محتوى لسة بيبيعوا منتجاتهم شُكك على أمل التحصيل يوما ما ...؟ فده موضوع آخر في وقت آخر سيتم شرحه بالتفصيل.